想不到早兩日篇生肖飾物會引來親朋好友、客人私底下問我,到底自己所屬的生肖該帶什麼飾物。(大家咁怕留言?)
重覆多次生肖飾物內所說的,我不太建議以飾物來催運,不過,大家問我會照答嘅。
昨晚好友M太太傳來張相,係伯有買俾佢嘅馬年掛飾, 睇完張相,我覺得就算再忙亦要馬上寫番篇。
店員同伯有講,明年馬年羊合太歲,肖犬者啱帶,店員講嘅其實有啱有錯,羊的確係合太歲,不過,唔啱肖犬者帶喎
首先,不如講講明年馬年,與馬沖犯刑破害及六合三合有乜生肖先。
馬年犯太歲,本命年,當然係馬犯太歲;
馬年沖太歲,馬地支午,鼠地支子,六沖中屬子午沖,鼠就係沖太歲;
馬年刑太歲,午午自刑,馬地支午,即係馬刑太歲(既犯太歲又刑太歲);
馬年害太歲,馬地支午,牛地支丑,六害中屬丑午相害,即係牛屬害太歲;
馬年破太歲,馬地支午,兔地支卯,六破中屬卯午相破,即係兔屬害太歲;
既然有同太歲唔啱key嘅生肖,自然亦有同太歲friends嘅生肖
馬年六合太歲,馬地支午,羊地支未,六合中午未合,即係羊係合太歲;
馬年三合太歲,馬地支午、虎地支寅、犬地支戌,三合中,寅午戌合,即係虎同犬都係三合太歲。
照咁睇,店員同M太太個媽媽講,羊係合太歲,無錯丫。
啱,真係無錯,但問題出喺羊係刑犬(未刑戌),羊合馬年嘅太歲,但同時間亦係刑犬,結果,合左太歲又刑自己,呢件事就錯晒啦。
又舉多個例,既然鼠犯太歲,係咪帶個合太歲嘅羊掛飾就啱呢?
錯! 因為係六害中,子未相害,即係鼠同羊相害,肖鼠者帶羊嘅飾物亦絕不適宜。
好複雜? 係,真係幾複雜,除咗六沖、六害、六破外,又有刑,賣者可能知道明年馬年羊係合太歲,但又未必知道羊係刑犬或鼠同羊係相害。
繼上篇生肖飾物中提過誤墮騙案嘅友人後,又一朋友買錯野,當然,由於親朋好友都知我無傾銷生肖飾物及風水用品嘅習慣,所以,次次都係出去買完先黎問我。
其實大家如果要幫襯,我建議大家花多少少錢,去一啲專業嘅玄學用品店買,當然,我唔係指紙扎舖,部份紙扎舖職員的確會知,但我遇過一啲紙扎舖職員連六害同六破都話未聽過。
如果想價錢合理一啲嘅,其實去近油麻地個段嘅上海街,有唔少佛具用品嘅店舖,職員肯定專業過飾物小店,價錢亦唔會太貴;如果想再專業一啲,可以幫襯專業嘅玄學師傅。(不過,我無經營此業,想買搵我係無用!)
時間許可的話,我會寫一篇到底乜生肖帶乜會適宜,不過,最多只能趕喺立春前寫,農曆新年前應該就趕唔切寫啦。