工作賺錢最終目的都係想有餐安樂茶飯食，食固然之重要，但食飯時張檯亦同樣重要，與其話飯檯對風水有影響，不如話對家運有影響更貼切。

三四十年前流行用可以朝行晚拆嘅摺檯；近年好多家庭都會添置張固定飯檯。 不過，張飯檯係咪用黎食飯另作別論。

我見過最利害嘅家庭，一張3*6呎嘅檯飯堆滿一疊疊衫，連檯帶衫每疊都高過我；亦見過張檯擺滿林林總總嘅雜物。(我屋企以前就係咁)

不論擺衫定擺其他野，都係歸納做飯檯擺滿雜物。 呢種情況嘅家庭，每每都會為鎖事而爭吵(動武就比較少)，家庭成員亦比較唔黐家。

張檯擺滿雜物，引申出另一個問題，就係食飯時要另開張檯先有飯食，但唔知由幾時開始，香港人由愛用嗰種大大張摺檯轉做愛用細細張嘅摺檯，坐喺梳化、凳仔食飯。

每次我去睇風水見到呢種情況，我都好想大叫，事關呢種情況係會影響到家庭各成員賺錢比較辛苦，甚至財運都比較差。

點解會影響財運? 因為人受委屈時會彎腰，食飯時都要彎腰，賺錢又點會唔比較辛苦。

好多人會話日本人同韓國人坐矮檯食飯點解又無影響? 因為佢地大多都係盤膝而坐，腰就算放鬆極亦唔需要彎腰，但坐梳化凳仔喺矮細檯仔食飯，係要彎腰食飯。

不論張細檯仔係朝行晚拆定係固定開，都同樣會有咁嘅影響。

所以，大家望一望屋企張飯檯，再諗一諗自己家庭嘅財運、賺錢如何，就應該知道要點做吧?