改運，好多人都好有興趣，我亦常被人問起點改運。

有啲人認為擺咗個風水陣，守株待兔地等好運降臨就得；亦有啲人認為搞壇大龍鳳出黎，祭天祭地乜都祭，自然求仁得仁。

風水同祭祀祈福固然係(兩)種好好改運嘅方法，兩者見效都可以好快，不過，絕對唔係人云亦云或者睇幾本書，甚至，上網search下就學得識、做得岩。

其實，只要從身心出發，修補心靈上一啲缺憾、改變自身一啲習慣、改善外表上某啲瑕疵，同樣可以做出改運嘅效果。

好多人或者會質疑，如果咁簡單就可以改到運，人地就唔洗花十萬八萬搵啲大師去改運。

花十萬八萬去改運，過程自然會由相關嘅專業師傅去處理當中一啲運作，以求達至某種改運程度。

等同搵一位專業嘅補習老師同搵家人補習一樣道理。專業補習老師可能可以令您喺短時間內由考D變考A，搵家人幫您補習，可能就要由考D慢慢變成考到C，再逐級而上。

既然搵專業人士去處理，自然要俾番專業價錢。

嗰啲價錢咁乸脷嘅改運法，未必岩我地呢啲星斗市民，所以，我決定寫個《從生活著手的改善運程方法》系列，教大家一啲簡單得來又唔洗點花大錢嘅改善運程方法，當中故事嘅主人翁有啲係我嘅客人、親戚朋友，甚至，會有我份，當然，係不定期更新啦。

如果大家有意搬一堆「算命唔係宿命論咩?咁邊有得改變丫!」、「咁簡單嘅人人都發左達啦」出黎質疑之前，我想問大家一個問題，大家嘗試過未? 未的話，又何必咁快去否定。

想知點簡單法? 生活上有啲乜細節其實對運程有影響? 就要密切留意《從生活著手的改善運程方法》系列啦。