香港吋金呎土，就算買得起樓，亦未必人人家住千呎大宅，為咗可以騰出更大活動空間，睡房可以千奇百怪。最近，喺某連鎖傢俬舖見到一種最高一層是固定的衣櫃，下面是書檯，將書檯向下拉，張床就會喺中間翻出黎嘅組合床。

當然，還有”正常版”組合床，例如下圖那種，床下面是櫃桶，床上面是另一組櫃。

呢種床，我見得最多用嘅就係老人家，往往家中老伴過世後，老人家讓出主人房俾仔女，自己遷往細房就會揀呢種床，貪佢夠多位擺野，衫褲少嘅，隨時連衣櫃都慳番。

呢種床其實犯咗風水大忌-橫樑壓頂。

唔好用”瞓咗落床，個櫃唔係遮到成個人架”等等理由黎拋唔算橫樑壓頂，因為只要橫樑佔張床五份一，已經算橫樑壓頂。

橫樑壓頂又如何呢? 百分之99.9都對健康有影響。

假如橫樑喺近頭位置，無病因嘅頭痛或者經常瞓厲頸；近腳，腳痛，尤其易生骨刺；近腹，腰骨痛、胃痛，尤其易出現消化系統毛病。

呢種床屬於橫樑壓頂，亦有種好多人都忽視嘅橫樑壓頂，就係牆架(唔知係乜? 某瑞典連鎖傢俬店網站幫到您)。

好多人喜歡喺近床位置裝牆架，有啲裝得比較高，有啲偷位網黎當床頭板(唔好又問，自己查)，甚至，我見過最離奇嘅裝喺床尾，瞓落床對腳要伸入牆架底。

如果細細塊嘅都無問題，但佔張床1/5闊或長咁就已經屬於橫樑壓頂；如果裝喺床頭高處嘅，唔好意思，幾長幾闊都算。

假如您或者家人經常有無故嘅痛症，不妨望望張床，會唔會有類似嘅(人為)橫樑壓頂問題存在。