從生活著手的改善運程方法 三

以前嘅私樓,部份主人房有獨立浴室,稱為套房,然後,多左工人房都會有獨立浴室,再然後,更出現一啲一間屋會有兩間甚至再多套房嘅單位。(復式或獨立屋另計)

好多人都認為各自用各自嘅廁所比較衛生,不過,廁所係去除污垢嘅地方,喺房入面係咪又真係咁衛生呢?

衛生角度唔講住,但喺風水學上,套房單位的確唔係咁好。

略有風水知識嘅朋友都知道,如果財位、病位落喺廁所的話就最麻煩。 雖然,大部份建築都會盡量將套房嘅廁所貼近客廁,方便排水渠嘅安裝,但往往有例外。

如果兩個廁所分別喺唔同位置,即係財位、病位落入廁所嘅機會會比其他單位高。

呢個係其一問題。

其二問題,假如主人房有兩道門,代表夫婦間易有異心,當然,有異心未必真係會出軌,可能記掛住舊情人都唔定。

但如果某啲飛星嘅組合正好落入主人房嘅浴室,咁就唔止個心出軌,連個身一樣都會出軌,易有婚外情出現。

化解方法? 其實最好將套房嘅浴室門移出房門外,簡單黎講就係將套房變回無浴室嘅房。

八九成(女性)客人聽完我講之後,都會大叫「咁我去廁所咪好唔方便囉」,當然,搵個合適嘅室內設計師或者裝修師傅,就可以整到好方便兼唔洗擔心夫婦間會出現第三者。

不過,大家又唔好睇漏眼,以為房內有廁所一定會有婚外情,個重點係喺會唔會有某啲飛星嘅組合咁岩落入房內嘅廁所到。

我有唔少朋友主人房都係套房,夫妻間感情亦非常好,各位就唔洗過份擔心,但房內有廁所,始終污氣易飄入房內,細菌會較多,所以,一定要長期閂上廁所門,並有適當嘅通風。

Share

Author: 姚棹甯 Cammy YIU

發表迴響

這個網站採用 Akismet 服務減少垃圾留言。進一步瞭解 Akismet 如何處理網站訪客的留言資料