點睇山上直幅

當晚友人問我點睇獅子山出現直幅件事,熟朋友都叫我組織過再寫番出黎同大家分享。

先旨聲明,呢篇文唔係完全引用風水或玄學角度去分析,當中加插咗一啲唔係一貫玄學嘅睇法入去,如果同您所學嘅風水或玄學不同,唔洗動氣,事關大家不妨當聽吓故事。

好多人都話直幅好似道符,甚至,有人話直幅係道符咁壓住獅子山個龍脈,搞到香港無運行。

香港龍脈分佈同走向,我唔喺到詳述,懂風水的自然知,唔懂嘅我又唔知點喺一篇文內簡述晒咁多座山嘅山脈同地形。

而且,根本唔關龍脈事,如果直幅影響到獅子山附近啲龍脈,咁龍脈所經之處啲高樓大廈嘅地基,唔打斷啲龍脈亦壓住啲龍脈卦。

話直幅似道符鎮住獅子山的話,我唔完全認同,睇過八十年代香港彊屍片應該都知符係貼係印堂之處,但直幅係貼咗喺獅子山「獅子」側面喎,又點鎮呢?

當然,彊屍片只係電影,您估真係黃飛鴻系列電影當真呀,所以,最好就問一問道教人士就會知點貼符,不過,我就唔識貼啦。

引伸落去似乜呢?我地不妨睇睇圖

lion圖片來源攀山攝水 facebook page

其實似賽馬時用黎遮隻馬對眼嘅眼罩,遮住佢側面嘅視線,只保留少許正前方嘅視線,等佢向住光嘅方向跑。

直幅正似呢種遮住獅子山「獅子」隻眼,令佢聚焦喺前方,雖然喺佢前面畫條直線就肯定唔係門常開,不過,獅子山屬於煞氣大嘅山,祥和之物鍾意停留風水好嘅地方,而煞氣重之物多數相反,喜歡去風水差嘅地方。

而門常開嘅風水好壞,應該唔識風水都知。

直幅就好似引導獅子山隻獅子衝去門常開一樣。

不過,大家又唔好開心住,煞氣咁重嘅獅子,如果衝向門常開,出事嘅不止係「無柒正苦」,甚至會係成個香港。

點解? 獅子先生唔會識得分要推冧「無柒正苦」定推冧啲乜,直幅只不過係引導佢衝過去。

所以,掛完直幅之後,就需要個人去引導獅子去做啲乜,否則,衝向一個處理民生政策嘅地方,受傷嘅好大機會會係普羅大眾。

能影響到咁大煞氣之物,一定唔會係尋常人家,起碼要個勢壓得住,當然,最好同無柒有啲牙齒印啦。

同友人講個時仲係星期四晚,由於友人出身自玄學家庭,對玄學略有知識,所以,大家都喺到諗嗰個會係邊個,不過,無結論。

所謂個勢,唔一定係要凶神惡煞,可能係一啲有背景嘅人,例如有財有影響力嘅,亦可以係啲無乜作為,只不過有壓場感,行出黎就算明知佢吹水,都可以令人聽下佢講乜先嘅人。

星期五走左兩個人出黎講野,一個係老懵懂,一個係大少。講勢,其實兩個都麻麻,不過都略略分析下佢兩個嘅優劣。

雖然,老懵懂做過「突手」,家庭背景雄厚過大少,但明顯佢係失運嘅人,佢係近乎講乜衰乜;

而大少曾幾何時都屬當旺嘅人,至少當年廿三條時佢抽完水無耐就真係咁岩擱置咗,呢種就係俗語所講嘅「行運醫生醫病尾」,雖然佢都曾經失落過,但又唔覺佢近來氣息太差。

可惜的是大少出黎講嘅唔係要求有真普選,而係叫無柒落台,假如佢真係嗰位可以引導獅子山啲煞氣嘅人,咁獅子山嘅煞氣自然衝住無柒去,同普選又變得無乜關係。

當然,巧合時時有,呢排特別多,星期六無柒無啦啦話宗教界同體育界對經濟無貢獻,類似講多錯多嘅野應該會接踵而來,當然,我相信獅子山啲煞氣就唔止令佢講多錯多咁簡單。

我認為好大機會爆出比五千萬更具醜聞性嘅國際話題,令佢惹上官非,不得不落台,當然,煞氣重有橫禍都唔出奇,不過,做人要積口德,就唔好隨便咀咒人。

可惜的是直幅掛咗喺獅子山嘅時間僅一日,大少就算真係引導到獅子山嘅煞氣去咬住無柒唔放,但再來一個重量級如李+x嘅人(先唔講佢地會唔會出聲或講乜),都已經唔能再引導獅子山嘅煞氣過去另一件事到。

所以,我睇法係直幅只可以迫使無柒更快落台,但大家爭取嘅 真普選,我又覺得 呢個咁似道符嘅直幅對件事無乜大幫助。

水,我抽完,事情發展如何大家應該仲有排睇。

Share

Author: 姚棹甯 Cammy YIU

發表迴響

這個網站採用 Akismet 服務減少垃圾留言。進一步了解 Akismet 如何處理網站訪客的留言資料