早兩日，同屋企「最高話事人」講開，廚房部抽油煙機好似唔多夠力，換機係遲早嘅事，佢竟然即日就”帶”我去買過部，既然要郁個廚房，當然，順便開始埋大掃除。

坊間不少雜誌到呢啲時候，都會請出不少玄學師傅提供一啲宜還神同大掃除嘅吉日吉時俾讀者，不過啲日子多數都係過年前一兩星期，如果好似我咁要換傢俬的話，嗰啲日子又未免遲咗啲。

如果大家屋企好似我咁，咁岩要換傢俬，想早啲大掃除嘅，不妨拎本通勝出黎，自己動手搵個吉日出黎。

無通勝嘅，唔緊要，我會在頁末提供幾日宜大掃除嘅日子俾大家。

一般喺通勝嘅後半部份係每日嘅宜忌，搵番宜掃舍個日，再睇睇有無沖自己所屬嘅生肖(內文會有寫)，無沖又宜掃舍嘅就大利可用。

如果時間所限，岩用嘅日子大家要返工或有不便嘅如何呢?

如果大家準備棄置舊傢俬嘅，不妨選擇用月破、歲破等嘅破日，取”破”舊的意思，不過，破日只宜破，如果只係單單打掃的話，用破日又可能較宜出現阻滯或意外。

咁惟有退而求其次，選取一啲無沖自己所屬生肖又方便自己打掃嘅日子，再選擇一個吉時進行。

現今社會，傢俬只是有點殘舊或款式過時，就會被棄置，其實好浪費，大家記得如果舊傢俬還能使用的話，不妨聯絡一些慈善機構，將舊傢俬捐贈出去，既可環保又能幫忙有需要的朋友。

本月宜大掃除的日子包括

(新曆)1月7號辰至午時(早上07:00-中午12:59)沖猴、

1月11號巳時(09:00-10:59)沖鼠、

1月14號辰時及申至酉時(07:00-08:59及15:00-18:59)沖兔、

1月19號辰時(07:00-08:59)沖猴、

1月23號酉時(17:00-18:59)沖鼠、

1月25號巳時及申至戌時(09:00-10:59及15:00-20:59)沖虎、

1月26號午時及申時(11:00-12:59及15:00-16:59)沖兔。

破日

1月12號月破，巳至午時及戌時(09:00-12:59及19:00-20:59)沖牛、

1月16號歲破，午時及酉至戌時(11:00-12:59及17:00-20:59)沖蛇、

1月24號月破，申時及戌時(15:00-16:49及19:00-20:59)沖牛、

1月28號歲破，午時及申時(11:00-12:59及15:00-16:59)沖蛇。