未知大家家中有否謝灶這習慣，由於我家「最高話事人」即係我媽，娘家多出廚師，自小她家裡就有謝灶這個習慣。

相傳灶君老爺除咗負責睇住廚房，確保爐灶平安之外，亦負責監察住每家每戶日常生活，到咗年底農曆十二月廿四日當日，灶君老爺就會回天庭覆命，稟報給玉皇大帝知道每個人平日的言行舉止如何，當然，亦少不了順便放個假。

民間除咗答謝灶君老爺平日照顧爐灶平安之外，亦希望灶君老爺回天庭覆命時，可以替自己多講個好說話，得到上天嘅祝福。

因此，謝灶時除了一般祭品外，亦會有用糖果或片糖嘅習慣(片糖比冰糖平，古時平民百姓較多用片糖)，意思就係希望灶君老爺食過甜點後，會多講好說話，亦有說是希望以糖的黏力，黏著灶君老爺把口，令佢少說話，不會將自己平日的惡行稟報出來。

民間習俗-「官三民四蜑五」，意思就係從官的人在農曆十二月廿三謝灶，平民百姓就在農曆十二月廿四謝灶，而俗稱蜑家人的水上人就在農曆十二月廿五謝灶。

不過，今年農曆十二月廿四，即是新曆1月24號，適逢是月破，大事不宜，而不論農曆十二月廿三或廿五都宜祭祀，作為平民百姓的您我，亦惟有推前或改後謝灶。

不少人都知不論商舖或住宅，在風水學說上大門都屬重要一環，不過，大家又知唔知灶頭嘅重要度係僅次於大門?

在風水學說上，灶底漏水家中的女主人易患婦科病，不過，以我經驗，除非嚴重漏水，否則，多數都係不分男女家人的腸胃都較弱易腹瀉。

除灶底漏水屬常見的問題外，其實喺吋金呎土嘅香港，灶底擺滿雜物亦屬常見。

此情況我遇見過不少，大多數家中女主人多患有各式型式的腿患，當然，亦非叫人絕不可在灶底擺放物品，只是擺放得整齊、適量就無問題。

其實，除了灶底，家居及辦公室都不宜囤積太多雜物，衛生問題係其一，其二亦易影響個人運勢，不過，這方面留待下次有時間再跟大家分享。